Í gær afhenti Elva Rakel Jónsdóttir, framkvæmdastjóri Svansins á Íslandi, Sigtúni þróunarfélagi Svansleyfi fyrir vottun bygginga í nýja miðbænum á Selfossi.
Nýi miðbærinn er stærsta einstaka verkefnið sem hefur hlotið Svansvottun á Íslandi og tekur til þrettán bygginga sem samtals eru 5.500 fermetrar. Mikil áhersla hefur verið lögð á umhverfismál við uppbyggingu miðbæjarins. Samið var við Umhverfisstofnun árið 2019 um Svansvottunina á byggingum, og samhliða er einnig að ljúka vottunarferli BREEAM Communities fyrir deiliskipulag miðbæjarsvæðisins.
Sýnir mikla samfélagslega ábyrgð
Elva Rakel Jónsdóttir, framkvæmdarstjóri Svansins, segir að Svansvottun bygginga sé í mikilli sókn og hafi eftirspurn og áhugi á þeim vaxið svo um munar undanfarin ár. „Það skiptir virkilega miklu máli að verkefni af þessari stærðargráðu sæki um umhverfisvottun en það sýnir mikla samfélagslega ábyrgð og eiga aðstandendur verkefnisins hrós
skilið,“ segir Elva.
Meginmarkmið Svansvottunar er að draga úr umhverfisáhrifum bygginga, sporna við hnattrænni hlýnun og vernda heilsu þeirra sem koma að verkinu á framkvæmdartíma sem og þeirra sem nota bygginguna eftir að hún er tekin í notkun.
Að sögn Gylfa Gíslasonar, framkvæmdastjóri JÁVERK, er þetta fyrsta stórverkefnið sem JÁVERK hefur farið með í gegnum allt vottunarferlið. „Við höfum byggt upp mikla þekkingu sem við munum nota áfram í okkar fyrirtæki. Við munum hefja á árinu 2022 byggingu á 430 Svansvottuðum íbúðum á höfuðborgarsvæðinu og Selfossi og ætlum okkur að sanna að það er hægt að byggja vandað og heilnæmt húsnæði á fullkomlega samkeppnishæfu verði þegar kunnáttan er fyrir hendi,” segir Gylfi.
Umhverfisvæn steypa og rík áhersla á flokkun
Svansvottunin tryggir að umhverfislegur ávinningur af verkefninu er umtalsverður. Má nefna að með notkun umhverfisvænni steypu spöruðust um 170 tonn af kolefnisígildum en það samsvarar ársnotkun um 50 fólksbíla. Lögð var rík áhersla á flokkun úrgangs á framkvæmdartíma og til að sporna við orkusóun var sett upp loftskiptikerfi með hitaendurvinnslu í öllum íbúðum. Þá var sérstök áhersla lögð á rakaforvarnir og verklag til að koma í veg fyrir rakaskemmdir og myglu.
Leó Árnason, stjórnarformaður Sigtúns þróunarfélags, segir að alþjóðlegar vottanir séu mikilvægar í verkefni sem þessu. „Það hefur verið lærdómsríkt og ánægjulegt að eiga samstarf við Umhverfisstofnun og verktaka okkar, JÁVERK, um þetta viðamikla verkefni. Við viljum hafa miðbæinn eins umhverfisvænan og okkur er unnt og teljum alþjóðlega viðurkenndar vottanir mikilvæga leið til þess,“ segir Leó.
Strangar kröfur um efnavörur
Svanurinn er opinbert umhverfismerki Norðurlandanna sem hefur það meginmarkmið að draga úr umhverfisáhrifum af vörum eða þjónustu og auðvelda neytendum að velja umhverfis- og heilsusamari kosti. Í Svansvottun felst að allar bygginga- og efnavörur sem notaðar eru við framkvæmdirnar séu umhverfisvottaðar en vörurnar þurfa að uppfylla strangar kröfur um innihald skaðlegra efna.