Vinnustofa var opnuð á 2. hæð í Grænumörk 5 á Selfossi í síðustu viku þar sem verkefninu Karlar í Uppsölum hefur verið komið á laggirnar.
Hugmyndin er að þar komi saman einstaklingar sem vilji hittast, sinna smíðavinnu, fá sér kaffi, spjalla og um leið eflast félagslega.
Meðlimir í Félagi eldri borgara á Selfossi, sem eru 60 ára og eldri og vilja sinna einhverskonar smíðavinnu eða hafa áhuga á smíðavinnu, eru velkomnir í vinnustofuna en þar er einnig aðstaða til að fá sér kaffi og spjalla. Verkefnið er á byrjunarstigi en verið er að þróa og móta svæðið og þau sem vilja taka þátt eru velkomin.
Opnunartími er mánudaga til fimmtudaga frá kl. 8:30 til kl. 16:00 og á föstudögum frá kl. 8:30 til kl. 14:00. Þátttakendur setja sjálfir upp vinnuaðstöðu og hafa frelsi til að byggja vinnustofuna upp eftir því sem hentar þeim best, svipað og fyrirkomulagið er hjá „Karlar í skúrum“.
„Vinnustofa eins og þessi er eitthvað sem hefur lengi verið þörf fyrir hér á svæðinu og virkilega ánægjulegt að þetta sé orðið að veruleika. Ánægjulegt líka að mennirnir sjálfir hafi leitað til okkar og við náð að vinna þetta hratt og vel með góðu samstarfi. Það er það sem við viljum, að fólk leiti til okkar með hugmyndir fyrir virkni og félagsstarf,“ segir Bylgja Sigmarsdóttir, tengiráðgjafi hjá Sveitarfélaginu Árborg.