Legendary Hotels & Resorts hefur gengið frá kaupum á Hótel Hellu og Árhúsum á Hellu en um er að ræða fyrstu fjárfestingu félagsins á Íslandi. Legendary hefur þegar tekið við rekstri hótelanna tveggja.
Viðskiptablaðið greinir frá þessu.
Hótel Hella og Árhús voru í eigu Southdoor ehf. Arnar Freyr Ólafsson, aðaleigandi og framkvæmdastjóri Southdoor, mun nú ganga til liðs við Legendary og annast þróun og uppbyggingu á eignum hótelfélagsins.
Arnar Freyr segir í samtali við Viðskiptablaðið að tíminn í Covid-faraldrinum hafi reynst Southdoor gríðarlega erfiður en kveðst spenntur fyrir nýjum tímum. „Við náðum að komast í gegnum þetta með gömlu góðu hörkunni. Við höfum nú selt reksturinn og fögnum þessari fjárfestingu,“ segir Arnar Freyr.
Árhús á Hellu er með 35 smáhýsi og veitingastað og Hótel Hella er með 45 herbergi. Í frétt Viðskiptablaðsins kemur fram að nýju eigendurnir hyggist ráðast í endurbætur á hótelunum á næstu mánuðum; stækkunar á Hótel Hellu og að bæta við lúxusherbergjum í Árhúsum.