Í júlí var boruð ný heitavatnshola í Kaldárholti í Rangárþingi ytra. Fyrir eru á svæðinu tvær vinnsluholur sem nýttar eru fyrir Rangárveitur.
Nýja holan, KH-39, er um 800 metra djúp og því um 300 metrum dýpri en holurnar sem fyrir voru. Fyrstu niðurstöður prófana benda til þess að afköst hennar séu sambærileg við eldri holurnar, en þær skila hvor um sig um 50 lítrum á sekúndu af 65°C heitu vatni.
Staðsetning holunnar var valin í samstarfi við ÍSOR og North Tech Drilling sá um borunina.
Á næstunni verða gerðar frekari prófanir á holunni og ef niðurstöður þeirra verða jákvæðar verður holan virkjuð.