Í Kaldárholti eru Veitur að hefja borun eftir heitu vatni fyrir Rangárveitu, sem styrkir meðal annars hitaveituna á Hellu og Hvolsvelli. Í Kaldárholti eru nú þegar tvær borholur í nýtingu sem hafa reynst vel en þörf er á að styrkja hitaveituna í vaxandi samfélagi á svæðinu.
Ein hola verður boruð í júlí og er þess vænst að vinna megi meira heitt vatn úr jarðhitakerfinu við Kaldárholtslæk en nú er gert. Vatnið í holunum sem fyrir eru er um 65°C heitt og vinnslugeta þeirra er samanlagt um 100 l/sek. Þær eru um 500 metra djúpar en nýja holan verður um 800 metra djúp.
Rannsóknir og eftirlit á lífríki og umhverfi
Við boranir er notað vatn til að ná upp úr holunni borsvarfi sem eru náttúruleg jarðefni. Þetta skolvatn er leitt í gegnum ferli þar sem grófasta borsvarfið fellur út áður en það fer í stóra svarfþró. Í svarfþrónni kólnar vatnið og fínni efni falla til botns. Veitur endurnýta síðan vatnið til borunar og þannig er hringrásarkerfi myndað á borstað.
Veitur hafa leyfi til að veita skolvatninu frá bornum í Kaldárlæk, en það er ekki í bígerð að nýta þann möguleika nema að litlu leyti og þá eingöngu ef allar aðrar leiðir hafa ekki skilað tilætluðum árangri. Veitur munu láta rannsaka lífríki og umhverfi í nágrenni borana áður en boranir hefjast og eftirlit verður stöðugt á svæðinu á meðan borun stendur.