Á stjórnarfundi Fischerseturs í júlí síðastliðnum var samþykkt að Vilhjálmur Sörli Pétursson kæmi inn í framkvæmdastjórn Fischersetursins og að Aðalsteinn Geirsson yrði varamaður. Í framkvæmdastjórn eru auk Vilhjálms þau Aldís Sigfúsdóttir og Jónas Yngvi Ásgrímsson.
Framkvæmdastjórnin sér um daglegan rekstur stofnunarinnar en núna yfir sumarmánuðina og út september er Fischersetrið opið daglega frá 13:00 til 17:00. Yfir vetrarmánuðina er það opnað samkvæmt óskum.
Það sem af er sumri hefur aðsóknin verið með ágætum eða um 15 til 20 gestir á dag og langflestir þeirra erlendir ferðamenn sem ferðast á eigin vegum. Flestir gestanna eru frá Bandaríkjunum, en annars koma gestirnir frá öllum heimsálfum og alltaf eitthvað um að Íslendingar komi. Sumir koma gagngert til landsins að heimsækja Fischersetur og margir fara og votta Bobby Fischer virðingu sína og heimsækja gröf hans við Laugardælakirkju, en þar er hann jarðsettur.
Í tilkynningu frá Fischersetrinu segir að gestir hafi sagt setrið með áhugaverðustu skáksöfnum í heiminum, ekki síst hvað varðar einn stærsta viðburð skáksögunnar, Einvígi aldarinnar, eins og einvígi Boris Spassky og Bobby Fischer árið 1972 í Reykjavík hefur verið kallað.
Stundum hefur verið boðið hefur verið uppá skákkennslu í Fischersetri fyrir grunnskólabörn í Árborg og nágranna-sveitafélögum. Einnig má nefna að Skákfélag Selfoss og nágrennis er með skákæfingar vikulega í Fischersetri á veturna og eru allir velkomnir, ungir sem aldnir.