Samið hefur verið við norska fyrirtækið Polarkonsult A/S um hönnun nýrrar Vestmannaeyjaferju sem mun leysa Herjólf af hólmi. Hönnun á að ljúka í febrúarlok á næsta ári en reiknað er með að smíði ferjunnar ljúki síðla árs 2016.
Hreinn Haraldsson, vegamálastjóri, skrifaði undir samninginn síðastliðinn mánudag. Samningsupphæðin er rúmlega 800 þúsund evrur eða um 124 milljónir króna. Innanríkisráðherra, Hanna Birna Kristjánsdóttir, heimilaði í febrúar fyrr á þessu ári að auglýsa útboð um hönnun ferjunnar. Um það sá starfshópur um hönnun og smíði nýrrar Vestmannaeyjaferju. Ríkiskaup annaðist auglýsingu útboðsins sem fór fram á Evrópska efnahagssvæðinu. Þrjú tilboð bárust en tvö þeirra reyndust ógild og því þriðja var hafnað þar sem það var langt yfir kostnaðaráætlun.
Að tillögu ráðgjafa starfshópsins, Jóhannesar Jóhannessonar skipaverkfræðings, voru teknar upp samningaviðræður við norska fyrirtækið Polarkonsult A/S sem áttu eina gilda tilboðið í hönnun ferjunnar. Samningurinn sem nú hefur verið undirritaður byggir á endurnýjuðu tilboði Polarkonsult og er samningsupphæðin svipuð og upphafleg kostnaðaráætlun gerði ráð fyrir. Undirverktaki er Force Technology A/S.
Á heimasíðu Vegagerðarinnar segir að upphaflega hafi verið gert ráð fyrir að hönnun lyki í nóvember í ár en vegna tafa verður það ekki fyrr en í febrúar á næsta ári. Og þá má reikna með að smíði skipsins verði boðin út og verkinu lokið síðla árs 2016.
Líkt og fram kemur í frétt á heimasíðu Polarkonsult þá er sérstæða verksins nokkur á alþjóða vísu þar sem veðuraðstæður utan við Landeyjahöfn eru erfiðar vegna mikillar öldu af hafi og smærri öldu af ströndinni auk sterks straums við mynni hafnarinnar. Þá er svo sem kunnugt er dýpi lítið, getur verið um 4,5 m, og því þörf á grunnristri ferju sem þarf þess utan að geta athafnað sig í 3,5 m hárri öldu.