Siglingastofnun hefur óskað eftir tilboðum í gerð nýrrar þjónustubryggju í Landeyjahöfn. Um er að ræða nýja bryggju sem verður staðsett gegnt ferjubryggjunni í höfninni.
„Þessi bryggja er aðallega hugsuð fyrir dýpkunarskipin og eins vegna almenns viðhalds á mannvirkjum þarna við hausinn og hafnargarðana,“ segir Sigurður Áss Grétarsson, forstöðumaður hafnasviðs Siglingastofnunar, í Morgunblaðinu í dag.
Hann segir að upphaflega hafi verið ætlunin að nota bryggju Herjólfs fyrir dýpkunarskip og önnur skip sem sinni reglulegu viðhaldi hafnarinnar. Það hafi hins vegar ekki reynst vel að nota ferjubryggjuna til þess.