Þriðjudaginn 5. maí síðastliðinn var ný brunavarnaáætlun Brunavarna Árnessýslu samþykkt. Áætlunin er samþykkt af Húsnæðis- og mannvirkjastofnun, stjórn BÁ og sveitarfélögunum á starfssvæði slökkviliðsins sem eru átta talsins.
„Það er mjög ánægjulegt að brunavarnaáætlunin okkar sé komin út og samþykkt af sveitarfélögum í Árnessýslu og HMS, en hún hefur verið í vinnslu um nokkurt skeið. Í mörg horn þarf að líta við gerð brunavarnaáætlana og margt sem þarf að slípa til eins og í allri annarri áætlunargerð,“ segir Pétur Pétursson, slökkviliðsstjóri BÁ.
„Með samþykkt og útgáfu brunavarnaáætlunarinnar kemur berlega í ljós að eigendur slökkviliðsins, sem eru sveitarfélögin í Árnessýslu eru samstíga um þær lagalegu skyldur sem á herðar þeirra eru lagðar um málaflokkinn. Að mönnun, viðbragð, tækja- og húsakostur séu í takt við þær kröfur og þarfir sem þurfa að vera til staðar, til þess að bregðast við þeim atburðum og verkefnum sem slökkviliðsmenn takast á við í sínum störfum hvort heldur sem er í fullu starfi eða hlutastarfi,“ segir Pétur ennfremur.
Markmið brunavarnaáætlunar er að tryggja að slökkvilið sé nægilega mannað, skipulagt, útbúið tækjum, menntað og þjálfað til að ráða við þær hættur sem steðja að í sveitarfélaginu.
94 prósent landsmanna með virka brunavarnaáætlun
Á þessu ári hefur einnig verið samþykkt ný brunavarnaáætlun hjá Brunavörnum Suðurnesja. Hlutfall slökkviliða landsins með virka brunavarnaáætlun er komið upp í 64 prósent og er markmiðið að 80 prósent slökkviliða séu með samþykkta brunavarnaáætlun fyrir árslok. Hlutfall landsmanna með virka brunavarnaáætlun er komið upp í 94 prósent og hefur aldrei verið hærra. Í lok árs 2025 voru 90 prósent landsmanna með virka brunavarnaáætlun.
Brunavarnaáætlunin er birt á vef HMS.