Báran, stéttarfélag á Selfossi, tekur undir með Samtökum atvinnulífsins að nauðsynlegt sé að samningsaðilar hefji nú þegar vinnu vegna næstu kjarasamninga.
Fundur samninganefndar Bárunnar, stéttarfélags, telur nauðsynlegt að “samningsaðilar hefji nú þegar vinnu vegna næstu kjarasamninga sem þarf að felast í mótun á sameiginlegri sýn á getu atvinnulífsins og samfélagsins til launahækkana og aukins kaupmáttar á næstu árum“.
Í tilkynningu frá Halldóru Sigr. Sveinsdóttur, formanni Bárunnar, segir að launafólkið í landinu hafi sýnt mikið æðruleysi í öllum þeim ólgusjó verðbólgu, verðhækkana og skattahækkana sem dunið hafa yfir síðustu misseri án nokkurs samráðs við launafólk. Í ljósi þeirrar staðreyndar að aftur og aftur hefur orðið forsendubrestur og samningsmarkmið hafa ekki náðst telur félagið að ekki verði lengur við unað.
Samninganefnd Bárunnar, stéttarfélags skorar á Samtök atvinnulífsins að koma á móts við launamenn þessa lands og stytta samningstímann í gildandi kjarasamningum frá 5. maí 2011 – 30. september 2013.