Sjóðurinn góði veitti úthlutun til 178 fjölskyldna í desember 2019, samtals að upphæð 6.260.000 kr.
Sjóðurinn góði var stofnaður árið 2008 í kjölfar bankahrunsins en hann er samstarfverkefni Lionsklúbba, kvenfélaga, kirkjusókna, félagsþjónustunnar í Árnessýslu og deilda Rauða krossins í Árnessýslu. Hlutverk sjóðsins er að styrkja einstaklinga og fjölskyldur sem standa höllum fæti og eiga ekki fyrir nauðþurftum fyrir jólin.
„Gjafir til Sjóðsins góða berast frá einstaklingum, félagasamtökum, stofnunum og verslunum bæði í formi peninga og jólagjafa. Í fyrra bárust okkur meðal annars bíómiðar frá Selfossbíó og einnig gaf veitingastaðurinn Krisp veglega matargjöf. Tölvubúnaður sem notaður er við umsóknir og úthlutanir hefur TRS lánað okkur án endurgjalds í nokkur ár. Einnig má nefna húsnæði og veitingar að ógleymdri mikilli sjálfboðavinnu,“ segir Erla Sigurjónsdóttir, deildarstjóri Árnessýsludeildar Rauða krossins, en hún er í starfshópi Sjóðsins góða.
Starfshópinn skipa fulltrúar áðurnefndra aðila, sem ásamt Hjálparstofnun kirkjunnar skipuleggja umsóknarferlið og annast úthlutun. Stuðst er við viðmið Hjálparstofnunar kirkjunnar varðandi mat á umsóknum.
Úthlutað er í desember úr sjóðnum vegna undirbúning jólanna og á vormánuðum vegna ferminga og eru allar umsóknir trúnaðarmál.
Sem fyrr segir var úthlutað tæplega 6,3 milljónum króna í fyrra ásamt gjöfum frá ýmsum aðilum. Jólatré voru staðsett í Hveragerði og á Selfossi og hægt var að setja pakka þar undir til gjafa. Að sögn Erlu er þörfin mikil núna en reiknað er með fleiri umsóknum þetta árið í ljósi ástandsins í þjóðfélaginu.
Fyrirtæki, félagasamtök og einstaklingar sem vilja styrkja Sjóðinn góða geta lagt inn á bankareikning 0325-13-301169, kt. 560269-2269. Úthlutunardagar verða auglýstir síðar.
Starfshópur Sjóðsins góða þakkar öllum þeim aðilum sem styrkt hafa sjóðinn á síðasta ári.