Nokkur innbrot og þjófnaðarmál

Sex nýlegum ljóskösturum var stolið af hvítum Dodge Ram bifreið sem stóð fyrir utan Austurmörk 11 í Hveragerði um helgina.

Þjófnaðurinn átti sér stað á tímabilinu frá klukkan 18 á föstudag til klukkan 10 á laugardag. Tveir kastaranna voru framan á bifreiðinni og tveir á þaki hennar.

Þá var brotist inn í tvö hesthús við Norðurtröð á Selfossi og Hlíðskjálf, félagsheimili hestamanna, í síðustu viku. Engu var stolið en rótað til og minni háttar skemmdir unnar á dyrabúnaði. Ekki er vitað hver ásetningur þeirra var sem brutust inn í húsin.

Hver sá sem veitt getur upplýsingar um hver eða hverjir voru að verki í þessum tilvikum eru beðnir um að koma þeim til lögreglu í síma 480 1010.

GSM síma var stolið úr anddyri íþróttahúss Grunnskóla Hveragerðis síðastliðinn miðvikudag. Nokkur brögð hafa verið að því undanfarið að farsímar hafa glatast þá annað hvort á þann hátt að eigendur hafa týnt þeim og símarnir ekki skilað sér eða þeim hreinlega stolið þar sem þeir hafa verið skildir eftir í yfirhöfnum í fatahengjum eða annars staðar á glámbekk. Fátt er annað fyrir símaeigendur en að gæta síma sinna og þeim mun betur eftir því sem verðmæti símanna er meira.

Eins og sunnlenska.is greindi frá í síðustu viku voru menn handteknir vegna gruns um innbrot í gáma og geymslur í Reykholti. Mennirnir viðurkenndu brot sín. Sýni var tekið af dísilolíu bifreiðarinnar sem þeir voru á. Olían reyndist vera lituð og verður ökumaður bifreiðarinnar kærður fyrir það.