Helgin sem leið var erilsöm hjá lögreglunni á Suðurlandi. Nokkrir skipulagðir viðburðir voru í umdæminu um helgina eins og Kótelettan á Selfossi, flughátíð á Hellu og Laugavegshlaupið og tónleikar í Þórsmörk.
Umferðin var þung um helgina og sérstaklega á Selfossi en hún gekk þó að mestu vel fyrir sig en nokkrir voru teknir fyrir ölvun við akstur í umdæminu um helgina. Þá fékk lögreglan á Suðurlandi um tíu minniháttar fíkniefnamál á sitt borð um helgina.
Mesta álagið var á Kótelettunni á Selfossi sem stóð frá fimmtudagskvöldi til sunnudagsmorguns. Áætlaður fjöldi gesta Kótelettunnar var vel á fimmta þúsund og að sögn lögreglu gekk viðburðurinn heilt yfir vel fyrir sig og gestir voru til fyrirmyndar. Eins og fram hefur komið var tilkynnt um þrjú kynferðisbrot, eignaspjöll og einhverja pústra á milli tónleikagesta og ofbeldi gegn lögreglumanni en engin líkamsárás hefur til þessa verið kærð til lögreglu.
Á Kótelettunni var töluvert um að ungmenni undir 18 ára aldri framvísuðu fölsuðum skilríkjum eða skilríkjum annarra til að freista þess að komast inn á tónleikana. Alls voru um 50 skilríki haldlögð vegna þessa og málin voru í kjölfarið tilkynnt til barnaverndar.
Í dagbók lögreglunnar kemur einnig fram að sala var stöðvuð í veitingavagni í miðbæ Selfoss um helgina þar sem veitingaaðili hafði ekki tilskilin leyfi til áfengis- og veitingasölu.