Foreldrar og forráðamenn allra barna í Hveragerði sem fædd eru árið 2018 fengu boð um leikskólavistun í haust og hófst inntaka elstu barnanna nú í ágúst.

Síðar í haust og í byrjun vetrar mun þeim yngstu bjóðast pláss en Hveragerðisbær stefnir að því að yngstu börn á leikskóla verði 10-11 mánaða undir lok árs.

„Bæjarfélagið hefur sjaldan getað boðið þessum hópi betri þjónustu en nú. Með uppbyggingu nýja leikskólans, Undralands, sem nú hefur verið tekinn að fullu í notkun hefur framboð á leikskólaplássum aukist til muna og því er nú mögulegt að bjóða jafn ungum börnum og hér um ræðir leikskólavistun,“ segir Aldís Hafsteinsdóttir, bæjarstjóri.