Báran, stéttarfélag og Sjúkraliðafélag Íslands harma þann niðurskurð sem enginn sjái fyrir endann á við Heilbrigðisstofnun Suðurlands á Selfossi.
Í sameiginlegri ályktun félaganna kemur fram að niðurskurðurinn sé kominn að eða fram yfir þolmörk fyrir löngu.
Ekkert lát sé á endalausum kröfum til niðurskurðar sem bitni bæði á þeim sem veita og nota þjónustuna. Starfsmenn séu að niðurlotum komnir, og enn eigi að skera niður.
Skorað er á stjórnvöld að snúa sér að forgangsröðun í meðferð fjármagns, og standa vörð um þjónustuna sem Heilbrigðisstofnun Suðurlands á að veita.