Niðurgreiðslur Sveitarfélagsins Árborgar á þjónustu dagforeldra hækka frá og með 1. mars næstkomandi úr 50.000 kr. í 65.000 kr. miðað við 8 tíma vistun.
Jafnframt verður dagforeldrum veittur stofnstyrkur að fjárhæð kr. 100.000 miðað við að dagforeldri sé með leyfilegan hámarksfjölda barna í gæslu.
Starfandi dagforeldrar, sem hafa starfað í meira en 8 mánuði samfellt, geta sótt um styrkinn 1. mars og verður hann greiddur í eingreiðslu fyrir 1. apríl næstkomandi. Dagforeldrar sem eru með skemmri starfsaldur eða hefja störf á árinu 2018 geta sótt um styrkinn þegar umsókn um leyfi til að starfrækja daggæslu hefur verið samþykkt. Styrkurinn verði greiddur í tvennu lagi, 50.000 kr. þegar umsókn hefur verið samþykkt og starfsemi hafin og 50.000 kr. þegar dagforeldri hefur starfað samfellt í 8 mánuði.
Auglýst eftir nýjum dagforeldrum án árangurs
Í frétt á heimasíðu Árborgar kemur fram að dagvistarplássum hjá dagforeldrum í Sveitarfélaginu Árborg hefur ekki fjölgað í takt við aukna eftirspurn síðastliðna mánuði. Sveitarfélagið birti í byrjun janúar auglýsingu þar sem áhugasamir voru hvattir til að gerast dagforeldrar, en án árangurs.
Nokkur fjöldi barna er nú á biðlista hjá dagforeldrum eftir þjónustu. Vonast er til að framangreindar breytingar hvetji áhugasama aðila til að hefja störf sem dagforeldrar.