Í morgun kom Forseti Íslands, frú Halla Tómasdóttir ásamt Birni eiginmanni sínum að Elliðaánum í Reykjavík, þar sem hún tók á móti Neyðarkalli 2025.
Að þessu sinni var það öflugur straumvatnsbjörgunarhópur sem flutti Neyðarkallinn yfir straumvatnið og afhenti forsetahjónunum.
Við tilefnið ítrekaði frú Halla mikilvægi sjálfboðaliðastarfs Slysavarnafélagsins Landsbjargar fyrir samfélagið og vonaðist til að vel yrði tekið á móti sölufólki.
Að þessu sinni er Neyðarkallinn í hlutverki straumvatnsbjörgunarmanns og þannig heiðrar Landsbjörg minningu góðs félaga, Sigurðar Kristófers McQuillan Óskarssonar, sem lést í hörmulegu slysi við æfingar í Tungufljóti, fyrir rétt um ári síðan. Það var gert í góðu samráði við fjölskyldu Sigurðar og björgunarsveitina Kyndil, sem hann veitti formennsku.
Þetta er ein af stóru fjáröflunarleiðum Björgunarsveitanna og stendur undir eðlilegri endurnýjun björgunarbúnaðar og þjálfunar félaga björgunarsveita um land allt. Björgunarsveitarfólk verður áberandi við fjölfarna staði næstu daga og í einhverjum sveitarfélögum verður gengið í hús. Sölunni lýkur næstkomandi sunnudag.