Netaveiði að hverfa í Þorlákshöfn

,,Hér hefur ekki verið bátur á sjó við netaveiðar vikum saman,” sagði Indriði Kristinsson, hafnarstjóri í Þorlákshöfn, í samtali við Sunnlenska.

Indriði sagði að mikil breyting væri nú að koma fram í sjávarútvegi og netaveiðar nánast að leggjast af frá Þorlákshöfn og reyndar einnig fleiri höfnum á suðvesturhorninu. Þetta hefur sem gefur að skilja í för með sér talsvert tekjufall fyrir höfnina í Þorlákshöfn.

,,Þetta er mikil synd enda eru hér frábær fiskimið fyrir utan. Það kom fram í netarallinu fyrir skömmu að það er nægur fiskur hér og Friðrik Sigurðsson náði í góðan afla þá. Það er blóðugt að ekki skuli vera hægt að sækja þetta og við verðum bara að vona að þorskkvótinn verði aukinn. Það gæti breytt miklu.”