„Nauðsynlegt að málið fari sína leið innan dómskerfisins“

„Ríkið er á móti innheimtu aðgangseyris að Geysissvæðinu en á sama tíma stendur hið opinbera fyrir innheimtu aðgangseyris á aðra ferðamannastaði, t.d. að Silfru á Þingvöllum.“

Þetta segir Bjarni Karlsson formaður Landeigendafélags Geysis ehf í tilkynningu sem félagið sendi frá sér í dag. Þar bendir Landeigendafélagið á tvískinnungshátt ríkisins í málinu.

„Rökin fyrir gjaldheimtu við Silfru eru þau sömu og við Geysi, verndun svæðisins, aðgangsstýring og uppbygging á aðstöðu fyrir ferðamenn. Ríkið sem hlutaeigandi að svæðinu við Bláa lónið gerir ekki athugasemd við að tekinn sé aðgangseyrir af ferðamönnum sem ganga umhverfis baðsvæðið né við innheimtu aðgangseyri að Vatnshelli sem er í eigu ríkisins, svo dæmi séu tekin,“ segir í tilkynningunni.

Staðfesting á lögbanni sem ríkið óskar að sett verði á innheimtu aðgangseyris að Geysissvæðinu var tekið fyrir hjá sýslumanninum á Selfossi nú í morgun. Lögbannsgerðinni hafði áður verið frestað um tíu daga. Formaður Landeigendafélagsins segist ekkert hafa heyrt frá ríkinu á þessum tíu dögum.

Við staðfestingu lögbannsins gerði Sýslumaðurinn á Selfossi ríkinu að reiða fram tryggingu að upphæð kr. 59.667.330 og skal sú upphæð berast embættinu fyrir kl. 10.00 miðvikudaginn 30. apríl, að öðrum kosti fellur lögbannið niður. Berist tryggingin fyrir tilsettan tíma hefur ríkið viku til þess að þingfesta staðfestingu lögbannsins og þá getur meðferð málsins fyrir dómstólum hafist.

Landeigendafélagið telur nauðsynlegt að málið fari sína leið innan dómskerfisins því mikilvægt sé að fá úr því skorið hvað eignarréttur landeigenda felur í sér og hvaða kröfur ríkið, sem minnihlutaeigandi, getur gert um yfirráð á svæðinu.