Maðurinn sem lést þegar húsbíll brann í landi Torfastaða í Grafningi um síðustu helgi hét Einar Jónsson.
Einar var 38 ára gamall, fæddur 21. ágúst 1982. Hann var með lögheimili að Akraseli 5 í Reykjavík, ókvæntur og barnlaus.
Í tilkynningu frá lögreglunni á Suðurlandi segir að samkvæmt bráðabirgðaniðurstöðu krufningar hafi Einar látist af völdum súrefnisskorts vegna brunans í bílnum. Nú er beðið endanlegrar niðurstöðu þeirra rannsókna sem fylgja krufningunni, sem og niðurstöðu tæknideildar um eldsupptakarannsókn. Sú vinna er tímafrek og fyrir liggur að hún muni taka einhverjar vikur.
Ekki er að vænta frekari upplýsinga frá lögreglu um rannsóknina að sinni.