Snarræði húsráðenda forðaði miklu tjóni þegar eldur kviknaði í kjúklingabúi í Einiholti í Biskupstungum á þriðja tímanum í dag.
Slökkviliðsmenn frá Brunavörnum Árnessýslu í Reykholti og á Flúðum fóru á staðinn auk þess sem dagvaktin á Selfossi var kölluð út.
„Það kviknaði þarna eldur í útvegg í kjúklingahúsi en húsráðendur náðu sjálfir að halda eldinum í skefjum og slökkva hann áður en við komum á staðinn. Slökkviliðsmenn könnuðu vettvanginn með hitamyndavélum og fullvissuðu sig um að það væri ekki eldur í húsinu,“ sagði Lárus Kristinn Guðmundsson, settur slökkviliðsstjóri, í samtali við sunnlenska.is.
„Þetta er nokkuð stórt hús og kjúklingar þar inni. Það varð eitthvað tjón á húsinu sjálfu en það má þakka snarræði fólksins að ekki fór verr,“ bætti Lárus við.
Lögreglan á Suðurlandi rannsakar eldsupptökin.