Fyrirtækið Mýrdælingur ehf. hefur komið að tveimur stórum kvikmyndaverkefnum það sem af er ári en að sögn Gísla D. Reynissonar er lítið um slík verkefni framundan.
Mýrdælingur er frá Vík í Mýrdal og sérhæfir það sig í ýmsum verkefnum meðal annars aðstoð við kvikmyndatökufólk. Mýrdælingur býður upp á sérhæfðan búnað sem nýtist inn á jöklum, svo sem stóra trukka, ferðaeldhús og tankbíla.
Þau verkefni sem Mýrdælingur hefur unnið að í ár eru hollensk mynd um Novaya Zemlya og síðan stórmynd Ridleys Scotts, Prometheus.
Sagði Gísli að talsverð vinna hefði verið vegna hollensku myndarinnar sem var unnin á Langjökli. ,,Annars er það vandinn með stærstu verkefnin að þá koma menn oft með flest tæki sjálfir þannig að minna er fyrir okkur að gera sem erum í þessu hér heima.”
Gísli kemur einnig að gerð auglýsingamynda og er mest að gera í slíkum verkefnum á haustin. Hann sagði að þrátt fyrir veikingu krónunnar hefði verkefnastaðan ekki batnað svo mikið þar sem erlend tryggingafélög hefðu hætt að tryggja verkefni á Íslandi. Til að brúa bilið hefur fyrirtækið gripið í margvísleg smíðaverkefni og sagði Gísli að nóg væri að gera í þeim.