Myndir af Skaftárhlaupi – Áin kolmórauð

Páll Jökull Pétursson, ljósmyndari á Selfossi, tók þessar myndir af Skaftárhlaupinu í Skaftárdal kl. 18:00 í dag. Þar er vegurinn farinn í sundur og áin kolmórauð.

Að sögn Páls vottaði aðeins fyrir brennisteinslykt, en hann var með vindinn í bakið.

Í tilkynningu sem Veðurstofan sendi frá sér í dag kemur fram að rennslisaukningin við Sveinstind sé hin örasta sem mælst hefur síðan stöðinni var komið á fót árið 1971. Fyrstu athuganir benda til að hlaupið verði eitt hið stærsta, sem komið hefur úr Skaftárkötlum.

Klukkan tíu í morgun var hlaupvatn komið niður að mælinum við bæinn Skaftárdal en neðan Skaftárdals skiptist Skaftá í þrjá farvegi og liggur einn um Eldvatn framhjá Ásum og gegnum Flögulón niður í Kúðafljót, annar út á Eldhraun í Árkvíslum og sá þriðji rennur framhjá Kirkjubæjarklaustri. (Sjá kort hér að neðan).

Helstu tímasetningar eru áætlaðar sem hér segir:

  • Útrennsli við jökuljaðar nær væntanlega hámarki aðfaranótt föstudags.
  • Líklegt er að rennslið nái hámarki við Ása og Kirkjubæjarklaustur aðfaranótt laugardagsins 3. okt.
  • Hugsanlegt er að hlaupvatn flæði upp á þjóðveg 1 í Eldhrauni, 5 – 10 km vestan við Kirkjubæjarklaustur. Einnig er hugsanlegt að ágangs hlaupvatns gæti við Stóra-Brest, 5 – 6 km austan við Ása.

Vegurinn að Skaftárdal er í sundur. sunnlenska.is/Páll Jökull Pétursson

Séð yfir Skaftá heim að Skaftárdal. sunnlenska.is/Páll Jökull Pétursson

Mikil iðuköst í ánni. sunnlenska.is/Páll Jökull Pétursson

sunnlenska.is/Páll Jökull Pétursson