Múlakvísl veitt undir bráðabirgðabrúna

Brúarsmíði bráðabirgðabrúar yfir Múlakvísl hefur gengið mun hraðar en áætlað var í fyrstu. Nauðsynlegt er að gera hlé á ferjuflutningum í dag á milli klukkan 17 og 21 þar sem veita á ánni undir brúna

Samkvæmt Vegagerðinni má gera ráð fyrir að um 3 – 4 tíma taki fyrir ána að setjast á nýjan leik svo hægt verði að hefja ferjuflutningana að nýju. Jarðýtur munu útbúa nýtt vað í framhaldinu.

Ákveðið hefur verið að lengja opnunartíma yfir vaðið, þannig að ekki verður hætt klukkan 23 eins og undanfarna daga heldur haldið áfram meðan þörf krefur.

Löggæsla verður aukin við Múlakvísl á meðan þessar framkvæmdir standa yfir. Vegfarendur eru beðnir um að sýna skilning og þolinmæði.