Óskatak ehf í Kópavogi átti lægsta tilboðið í endurnýjun 3 km kafla af Laugarvatnsvegi frá Laugarvatni að Hjálmsstöðum sem vinna á að í sumar.
Tilboð Óskataks hljóðaði upp á 219,5 milljónir króna og er 92,3% af áætluðum verktakakostnaði Vegagerðarinnar sem er 237,8 milljónir króna.
Aðeins munaði 0,2 prósentum á tveimur lægstu tilboðunum. Colas Ísland í Hafnarfirði bauð 220,0 milljónir króna en þriðja tilboðið, sem var frá Malbikunarstöðinni Höfða hljóðaði upp á 267,7 milljónir króna.
Verkið felst í að jarðvegsskipta fyrir breikkun í köntum, fræsa upp núverandi slitlagi á veginum, leggja út 20 cm þykkt burðarlag, endurnýja ræsi og malbika svo yfir.
Verkinu á að vera lokið þann 15. ágúst næstkomandi.