Vörubílstjórafélagið Mjölnir á Selfossi átti lægsta tilboðið í gerð nýs flóðavarnargarðs austan við Vík í Mýrdal.
Tilboð Mjölnis hljóðaði upp á rúmar 19,5 milljónir króna og var 76% af áætluðum verktakakostnaði Vegagerðarinnar, sem er 25,7 milljónir króna.
Aðeins munaði tæpum 106 þúsund krónum á tveimur lægstu tilboðunum en Þjótandi á Hellu bauð rúmlega 19,6 milljónir króna. Þriðja tilboðið sem var undir kostnaðaráætlun kom frá Snilldarverki á Hellu, tæpar 20,9 milljónir króna.
Sjö önnur tilboð, sem voru yfir kostnaðaráætlun, bárust í verkið. Keyrt og mokað bauð 26,2 milljónir króna, Framrás 26,7 milljónir, Ísrefur 32,7 milljónir, Heflun 36,0 milljónir, JG verktakaþjónusta 37,8 milljónir, Jörvi 39,6 milljónir og Stórverk 49,0 milljónir.
Um er að ræða 900 m langan varnargarð frá fjárhúsavegi að Kötlugarði austan við þéttbýlið í Vík. Í verkið fara um 10 þúsund rúmmetrar af möl úr Múlakvísl.
Verkinu á að vera lokið að fullu þann 1. mars næstkomandi.