Fórnarlamba umferðarslysa var minnst við Björgunarmiðstöðina á Selfossi í dag, líkt og víða annars staðar á landinu, en í dag er alþjóðlegur minningardagur um fórnarlömb umferðarslysa.
Viðbragðsaðilar í Árnessýslu komu saman við björgunarmiðstöðina þar sem kveikt var á kertum til minningar um þau sem hafa látist í umferðarslysum. Að því loknu var einnar mínútu þögn haldin til að heiðra minningu þeirra og sýna aðstandendum samúð og stuðning.
Að athöfn lokinni óku viðbragðsaðilar saman hring um Selfoss til að minna á mikilvægi umferðaröryggis.
Í umfjöllun um minningardaginn hefur komið fram að ungir ökumenn eru hlutfallslega talsvert líklegri til að lenda í slysum og óhöppum en þeir eldri. Á hinn bóginn staðfesta gögn frá Samgöngustofu að ungir ökumenn hafi bætt sig á síðustu árum og standi sig almennt betur í umferðinni en áður. Mjög alvarlegar undantekningar eru frá þessari almennu þróun. Síðustu mánuði og misseri hafa orðið hræðileg slys sem rekja má til hraðaksturs eða annarrar áhættuhegðunar ungra ökumanna.
Eyjólfur Ármannsson innviðaráðherra sagði í ávarpi í tilefni af minningardeginum að stjórnvöld hygðust mæta þessari þróun með markvissum aðgerðum, þ.á m. breytingum á umferðarlögum til að stemma stigu við hraðakstri og áhættuhegðun og fræðsluátaki í samvinnu við ungmenni, foreldra og skólasamfélagið.