Minningar-máltíð á Eyrarbakka

Seint í kvöld, þann 30. mars, eru 80 ár frá tví skoski togarinn Loch Morar strandaði í brimgarðinum milli Eyrarbakka og Stokkseyrar, um það bil 500 faðma frá skerjagarðinum út undan Gamla Hrauni, á stað sem kallast Framnesrif eða Hraunstangar.

Á togaranum voru tólf menn og fórust allir. Lík sex þeirra fundust í fjörum við Eyrarbakka næstu vikur og mánuði og voru jarðsett í Eyrarbakkakirkjugarði.

Loch Morar lagði úr höfn í Aberdeen 22. mars 1937 áleiðis til Íslandsmiða undir stjórn Walter Edward Barber sem var reyndur og dugandi skipstjóri. En hvað varð til þess að skipið strandaði í brimgarðinum á Eyrarbakka verður víst aldrei vitað.

Gunnar Olsen hefur í áratugi séð um að halda við krossum á leiðum þeirra 6 skipverja sem hvíla í Eyrarbakkakirkjugarði. Árið 2012 smíðaði Reynir Jóhannsson nýja krossa að frumkvæði Gunnars Olsen og Jóns Hákons Magnússonar með stuðningi frá breska sendiráðinu á Íslandi.

Í hádeginu í gær komu um 30 menn úr Flóanum saman í félagsheimilinu Stað á Eyrarbakka til minningar-máltíðar um skipverjana tólf á Loch Morar og var á borðum siginn fiskur sem verkaður hefur verið við félagsheimilið.

Jafnframt heiðruðu viðstaddir minningu þeirra Gunnars Olsen og Jóns Hákons Magnússonar sem báðir hafa látist nú á síðustu misserum.

Siggeir Ingólfsson og Reynir Jóhannsson lýstu því yfir að þeir mundu taka við merki þeirra Gunnars Olsen og Jóns Hákons Magnússonar og sjá um viðhald krossana á leiðum skipverjanna af Loch Morar í Eyrarbakkakirkjugarði.

Vestfirska forlagið á Þingeyri lagði til bækur í bókalottó eins og það gerir gjarnan á samkomum Vina alþýðunnar sem stóðu fyrir þessari minningarstund í gær.

Myndir frá Menningar-Stað


Frétt á forsíðu Alþýðublaðsins 31. mars 1937


Krossarnir í Eyrarbakkakirkjugarði voru endurnýjaðir haustið 2012. sunnlenska.is/Björn Ingi