Nóttin hjá lögreglunni á Suðurlandi var mun rólegri en undanfarnar nætur. Talsvert hafði fækkað á tjaldsvæðum í uppsveitum Árnessýslu í gær.
Lögregla viðhafði mjög öflugt eftirlit með ölvunar- og vímuefnaakstri í uppsveitum sem og við Landeyjahöfn.
Einn ökumaður var stöðvaður undir áhrifum áfengis og einn án ökuréttinda. Þá voru nokkrir ökumenn kærðir fyrir of hraðan akstur. Engin fíkniefnamál komu til kasta lögreglu né líkamsárásir og var það samdóma álit lögreglumanna að mun minni ölvun og vímu hafi verið að sjá á gestum tjaldsvæða en undanfarnar nætur.
Lögregla mun halda uppi öflugu eftirlit í dag með ölvunar- og vímuefnaakstri og hvetur því ökumenn að huga vel að ástandi sínu eftir skemmtanahald helgarinnar, gefa sér góðan tíma til heimferðar og leggja ekki af stað nema allsgáðir og úthvíldir.