Mikill léttir fyrir íbúa sýslunnar

Sveitarstjórnir Mýrdalshrepps og Skaftárhrepps fagna því að þjóðvegur 1 við Múlakvísl er nú aftur opinn fyrir umferð.

Sveitarstjórnirnar vilja koma á framfæri miklu þakklæti til Vegagerðarinnar og starfsmanna hennar fyrir afar snör handtök við að koma á vegasambandi á ný.

“Lífæð sveitarfélaganna er þjóðvegur 1 og því mikill léttir fyrir þá sem búa og starfa í sýslunni að því óvissuástandi sem skapaðist við rof hringvegarins sé aflétt,” segir í fréttatilkynningu sem sveitarfélögin sendu út í dag.

Jafnframt er komið á framfæri einlægu þakklæti til allra þeirra fjölmörgu björgunarsveitarmanna og annarra sem stóðu langar vaktir við að ferja fólk og farartæki yfir Múlakvísl við erfiðar aðstæður.