Undanfarna sólahringa hefur rafleiðni í Múlakvísl mælst há miðað við árstíma. Leiðnin hefur mælst í kringum 250-270 μS/cm síðan 30. ágúst.
Leiðnimælingar segja til um magn jarðhitavatns í ám og há gildi benda til þess að jarðhitaleki sé í gangi líkt og var þann 19. ágúst síðastliðinn. Vatnshæð hefur ekki hækkað samhliða aukinni leiðni en ekki er hægt að útiloka að slíkt gerist þegar fram líða stundir.
Í tilkynningu frá Veðurstofunni segir að mikil gasmengun fylgi þessum jarðhitaleka en stofan er með gasmæli við Láguhvola sem eru um 2 km frá jökuljaðri Kötlujökuls. Í nótt mældist aukning í brennisteinsvetni (H2S) og er nú komið yfir heilsuverndarmörk. Því er varhugavert að staldra við nálægt ánni eða vera nálægt upptökum hennar við jökuljaðarinn.
Á svæðinu er hægur vindur eða jafnvel logn svo gas mun safnast fyrir í lægðum í landslagi sem getur verið mjög varhugavert fyrir ferðalanga á svæðinu. Ef fólk finnur fyrir einkennum, svo sem sviða í nefi eða augum, á að yfirgefa svæðið strax.
