Fjölskyldu- & bæjarhátíðin Flúðir um Versló verður haldin í fimmta skiptið um komandi helgi. Eins og nafnið gefur til kynna fer hátíðin fram um verslunarmannahelgina á Flúðum.
„Það verður mikið um dýrðir alla helgina og er dagskráin er miðuð umfram allt á fjölskyldur. Öll fjölskyldan kemur saman og skemmtir sér,“ sagði Bessi Theodórsson, framkvæmdastjóri hátíðarinnar, í samtali við sunnlenska.is.
Meðal þess sem er í boði er Sprell leiktækjakarnival alla helgina, BMX Brós, Ljósbrá Loftsdóttir, sveitamarkaður, furðubátakeppnin, brenna og brekkusöngur, tónleikar með Pálma Gunnarssyni og Eyþóri Inga og auðvitað Vélfangs Traktoratorfæran vinsæla. Þar verður til dæmis til sýnis stærsta dráttarvél landsins.
Þessu til viðbótar verður fjölbreytt næturlíf og koma margir af fremstu tónlistarmönnum landsins fram; Hildur, Bríet, Aron Can, Made in sveitin og Stuðlabandið.
„Alla helgina verður starfrækt upplýsingamiðstöð og á sama stað verður opið kaffihús. Það er um að gera fyrir mömmur, ömmur, frænkur, pabba, afa og frændur að njóta dýrindis veitinga meðan yngri fjölskyldumeðlimir hoppa og skoppa í leiktækjum. Jafnvel aðeins útí kaffið. Svæðið tekur öllum opnum örmum og það er mikið um að vera í Hrunamannahreppi – og alltaf gott veður,“ bætir Bessi við.
Hátíðin er samstarfsverkefni Sonus viðburða, Hrunamannahrepps og fjölda einstaklinga og fyrirtækja sem vilja bjóða gestum á Flúðum upp á gæða afþreyingu alla verslunarmannahelgina. Gott er að hafa í huga að ef spurningar vakna varðandi tjaldsvæði er best að beina þeim fyrirspurnum til Tjaldmiðstöðvarinnar á Flúðum.