Um 20% aukning varð í komufjölda á bráðadeild Heilbrigðisstofnunar Suðurlands í júní og júlí mánuði miðað við sama tíma í fyrra. Sjúklingafjöldinn tvöfaldaðist um verslunarmannahelgina miðað við árið 2015.
Þetta kemur fram í föstudagspistli Herdísar Gunnarsdóttur, forstjóra stofnunarinnar. Hún segir að þetta hafi skapað vaxandi álag á starfsfólk á sama tíma og nauðsynlegt hafi verið að draga úr stoðþjónustu.
Ef eingöngu er skoðuð verslunarmannahelgin á Selfossi þá tvöfaldaðist fjöldi sjúklinga sem þurfti að leita á bráðamóttöku á Selfossi verslunarmannahelgina 2016. Þá komu að jafnaði um 50 sjúklingar á sólarhring miðað við að um verkunarmannahelgina árið 2015 leituðu að jafnaði um 25 sjúklingar með bráð veikindi og slys á sjúkrahúsið á Selfossi.“
„Ljóst er að miðað við óbreyttar fjárveitingar verður ekki hægt að fylgja eftir aukinni eftirspurn eftir bráðaþjónustu á Suðurlandi. Hátíðarhöld í Vestmannaeyjum um verslunarmannahelgina valda auknum kostnaði hjá stofnuninni og fjölmargir leituðu til HSU í Vestmannaeyjum þá helgi. Þá voru fimm sjúklingar fluttir með sjúkraflugi til aðgerðar á Landspítala vegna áverka eða brota sem þeir hlutu á þjóðhátíð í Vestmannaeyjum,“ segir Herdís, ásamt því sem sjúkraflutningar halda áfram að aukast á Suðurlandi.
„Miðað við sumarmánuðina maí, júní og júlí í fyrra er nú á sama tíma 7% aukning í fjölda sjúkraflutninga. Vegna langra vegalengda fyrir hvern flutning hefur því í vaxandi mæli þurft að auka við mönnun til að sinna auknum bráðaútköllum, með tilheyrandi kostnaðarauka,“ segir Herdís og bætir við að við óbreytt ástand muni innviðir í heilbrigðisþjónustu á Suðurlandi lenda á þolmörkum hvað varðar vaxandi álag á starfsfólk, með sívaxandi fjölda verkefna sem ekki er hægt að vísa annað.
„Í vor og sumar hefur verið leitað allra leiða, í samvinnu við hagsmunaðila, til að sinna grunnskyldum við veitta þjónustu á HSU og tryggja þannig íbúum og ferðafólki örugga og góða þjónustu,“ segir Herdís. Hún segir að starfsfólk HSU eigi heiður skilið fyrir eljusemi og fagmennsku við oft á tíðum krefjandi aðstæður.