Mikið sprengigos í gangi

Mikið sprengigos er í gangi í Eyjafjallajökli þó heldur hafi dregið úr virkninni frá hámarkinu sl. fimmtudag.

Töluvert gjóskufall er í nærsveitum og má búast við áframhaldandi gjóskufalli miðað við virknina í dag. Enn má búast við töluverðum sveiflum í styrk gossins með breytilegu gjóskufalli.

Tilkynningar um öskufall hafa komið frá Hæli í Gnúpverjahreppi, á veginum að Sultartangavirkjun og Laugarási í Biskupstungum þar sem askan var örfín og grá.

Stöðugar eldingar, hátt í tíu á klukkustund hafa mælst á eldingamælum bresku veðurstofunnar.

Ekkert hefur sést til gosstöðva í dag en gosmökkurinn liggur í 6-7 km hæð og rís beint upp af gosstöðvum. Í könnunarleiðangri í gær var töluvert gjóskufall sunnan við Goðastein og færðist það vestar þegar leið á daginn. Eldingar voru tíðar og fylgdu þeim þrumur.

Þetta kemur fram á minnisblaði Veðurstofunnar og Jarðvísindastofnunar HÍ sem gert var kl. 17 í dag.