Litlar breytingar urðu á fylgi stjórnmálaflokkanna í Suðurkjördæmi á milli mánaða en Miðflokkurinn nýtur enn mests fylgis í kjördæminu samkvæmt nýjasta Þjóðarpúlsi Gallup, sem tekinn var í mars.
Miðflokkurinn er með 25,4 prósent fylgi og lækkar um 1,6 prósent á milli mánaða. Sjálfstæðisflokkurinn er með 24,2 prósent fylgi, svipað og síðustu tvo mánuði á undan og Samfylkingin er með 22,3 prósent og hækkar um 1,6 prósent á milli mánaða.
Þar fyrir neðan bætir Flokkur fólksins lítillega við sig og er í 7,9 prósentum, Framsókn dalar talsvert með 6,9 prósent og Viðreisn lækkar lítillega og er með 5,3 prósent fylgi.
Vinstri grænir hafa verið í kringum 2 prósentin frá síðustu kosningum en rjúka nú upp í 4,6 prósent. Aðrir flokkar eru með mun minna fylgi; Píratar, Sósíalistaflokkurinn og aðrir eru undir 2 prósentum.
Yrðu þetta niðurstöður Alþingiskosninga fengju Miðflokkurinn og Sjálfstæðisflokkurinn 3 kjördæmakjörna þingmenn í Suðurkjördæmi, Samfylkingin 2 og Flokkur fólksins 1. Framsókn og Viðreisn myndu ekki ná inn kjördæmakjörnum þingmanni.
Gallup fékk 546 svör frá kjósendum í Suðurkjördæmi í netkönnun sem gerð var dagana 2. til 31. mars og birtir sunnlenska.is niðurstöðurnar úr Suðurkjördæmi í samstarfi við RÚV. Einstaklingar í úrtaki voru handahófsvaldir úr Viðhorfahópi Gallup.
Á landsvísu
Helstu breytingar milli mánaða á landsvísu eru að fylgi Framsóknarflokksins minnkar um nær 2 prósentustig. Ekki eru tölfræðilega marktækar breytingar á fylgi annarra flokka. Slétt 30% kysu Samfylkinguna ef kosið yrði til Alþingis í dag, næstum 21% Miðflokkinn, tæplega 20% Sjálfstæðisflokkinn, slétt 10% Viðreisn, nær 6% Flokk fólksins, nærfellt 5% Framsóknarflokkinn, rúmlega 4% Vinstri græn, hartnær 3% Pírata og um 2% Sósíalistaflokk Íslands. Næstum 7% myndu skila auðu eða ekki kjósa og rösklega 13% taka ekki afstöðu eða vilja ekki gefa hana upp. Ríflega 50% þeirra sem taka afstöðu styðja ríkisstjórnina.