Miðflokkurinn og Sjálfstæðisflokkurinn njóta meira fylgis en Samfylkingin í Suðurkjördæmi í nýjasta Þjóðarpúlsi Gallup, sem tekinn var í febrúar. Fylgi Samfylkingarinnar dalar mikið á milli mánaða.
Miðflokkurinn er stærstur í Suðurkjördæmi með 27,0 prósent fylgi og hækkar um 4 prósent á milli mánaða. Sjálfstæðisflokkurinn er með 24,0 prósent fylgi, svipað og í janúar. Samfylkingin er með 20,7 prósent en var með 26,4 prósent í janúar.
Þar fyrir neðan bætir Framsókn við sig fylgi, Framsókn er með 9,4 prósent, Flokkur fólksins bætir við sig og er í 7,7 prósentum en Viðreisn dalar talsvert og er með 6,0 prósent.
Aðrir flokkar eru með mun minna fylgi; Vinstri grænir, Píratar, Sósíalistaflokkurinn og aðrir eru undir 2,5 prósentum.
Yrðu þetta niðurstöður Alþingiskosninga fengju Miðflokkurinn og Sjálfstæðisflokkurinn 3 kjördæmakjörna þingmenn í Suðurkjördæmi, Samfylkingin 2 og Framsókn 1.
Gallup fékk 536 svör frá kjósendum í Suðurkjördæmi í netkönnun sem gerð var dagana 2. febrúar til 1. mars og birtir sunnlenska.is niðurstöðurnar úr Suðurkjördæmi í samstarfi við RÚV. Einstaklingar í úrtaki voru handahófsvaldir úr Viðhorfahópi Gallup.