Fylgi Miðflokksins heldur áfram að rjúka upp í Suðurkjördæmi en annan mánuðinn í röð eykst það um um það bil 10 prósent, samkvæmt nýjasta Þjóðarpúlsi Gallup sem tekinn var í nóvember.
Miðflokkurinn var með 11,8 prósent í september og hækkaði sig um 10,1 prósent í október. Í nýjasta Þjóðarpúlsinum hækkar Miðflokkurinn sig um 8,9 prósent til viðbótar og er nú með 30,8 prósent fylgi í Suðurkjördæmi. Flokkurinn fengi fjóra kjördæmakjörna þingmenn ef gengið væri til kosninga nú en fékk einn í síðustu kosningum.
Samfylkingin eykur fylgi sitt á milli mánaða og er nú með 25,5 prósent og þar á eftir kemur Sjálfstæðisflokkurinn með 20,6 prósent og lækkar um 2,6 prósent á milli mánaða. Samfylkingin fengi þrjá þingmenn ef kosið væri í dag og Sjálfstæðisflokkurinn 2.
Fylgi Flokks fólksins í Suðurkjördæmi hefur dalað jafnt og þétt frá síðustu Alþingiskosningum og tekur nú um það bil 4 prósent dýfu annan mánuðinn í röð. Flokkur fólksins er með 5,9 prósent fylgi í Suðurkjördæmi og kæmi ekki manni inn á þing í kjördæminu.
Viðreisn nær heldur ekki inn kjördæmakjörnum manni í kjördæminu og tapar 2,6 prósentum á milli mánaða, er með 6,2 prósent en fylgi Framsóknarflokksins eykst lítillega á milli mánaða eftir skell í síðasta mánuði og er Framsókn nú með 6,6 prósent.
Aðrir flokkar eru með mun minna fylgi en Vinstri grænir, Píratar, Sósíalistaflokkurinn og aðrir eru undir 1,8 prósentum.
Yrðu þetta niðurstöður Alþingiskosninga fengi Miðflokkurinn 4 kjördæmakjörna þingmenn í Suðurkjördæmi, Samfylkingin 3 og Sjálfstæðisflokkurinn 2.
Gallup fékk 533 svör frá kjósendum í Suðurkjördæmi í netkönnun sem gerð var dagana 3.–30. nóvember og birtir sunnlenska.is niðurstöðurnar úr Suðurkjördæmi í samstarfi við RÚV. Einstaklingar í úrtaki voru handahófsvaldir úr Viðhorfahópi Gallup.