Miðbæjarkötturinn Snuðra, sem heillað hefur fólk á öllum aldri í miðbæ Selfoss undanfarin ár, er farin í sumarlandið.
Snuðra var svæfð í gær eftir að kom í ljós að hún var með stórt æxli og ekkert hægt að gera fyrir hana. Hún fékk að sofna svefninum langa í litlum kassa en þeir sem þekktu Snuðru vissu að henni leið alltaf best í þröngum og litlum kössum.
Snuðra, sem átti heimili á Kirkjuveginum, rétt við miðbæinn, hóf að venja komur sínar í nýja miðbæinn fljótlega eftir að hann opnaði sumarið 2021. Snuðra var fastagestur á Konungskaffi, í versluninni Hlöðunni, ísbúðinni Groovís og fleiri stöðum í miðbænum og þar sem þessi ljúfa og fallega kisa gladdi gesti og gangandi.
