Lögreglan á Suðurlandi ásamt björgunarsveitum af Suðurlandi og höfuðborgarsvæðinu stóðu í gærkvöld og nótt í leit að tveimur erlendum ferðamönnum sem voru við göngu á Grímsfjalli.
Þeir sendu frá sér neyðarboð í gegnum neyðarsendi sem þeir höfðu meðferðis en mennirnir höfðu skilað inn ferðaplani hjá Safetravel svo góðar upplýsingar voru um þá og búnað þeirra.
Erfitt veður var á jöklinum og sóttist ferðin seint, en þeir fundust um þrjúleytið í nótt þar sem þeir höfðu grafið sig í fönn. Þeir voru heilir á húfi, en kaldir.
Verið er að flytja þá til byggða þar sem lögregla mun ræða við þá, en ferðalagið gengur seint þar sem færið er erfitt og um langan veg að fara.