Bæjarráð Árborgar samþykkti á fundi sínum í gær tilboð Sigtúns þróunarfélags um leigu eða kauprétt á bílastæðahúsi í nýjum miðbæ Selfoss.
Málið var tekið fyrir að beiðni Gunnars Egilssonar, bæjarfulltrúa D-lista og var tillagan samþykkt með atkvæði Gunnars og Tómasar Ellerts Tómassonar, bæjarfulltrúa M-listans. D-listinn er einn í minnihluta í Árborg.
Tillaga Eggerts Vals Guðmundssonar, bæjarráðsfulltrúa S-lista og formanns bæjarráðs, um að fresta ákvörðun í málinu var felld með atkvæðum Gunnars og Tómasar gegn atkvæði Eggerts.
Í tilboði Sigtúns þróunarfélags er sveitarfélaginu boðið að leigja 229 bílastæði í tveggja hæða bílastæðahúsi á baklóð við Eyraveg. Um er að ræða 10 ára leigusamning og hefur sveitarfélagið kauprétt á bílastæðahúsinu í janúar ár hvert. Kaupverðið er 350 milljónir króna fyrir árið 2022 og lækkar um 5% á ári eftir það, en er bundið vísitölu neysluverðs. Leigukostnaðurinn í tilboðinu er 41,4 milljónir króna á ári, auk jafnvirði fasteignagjalda af byggingunni og 10% veltutengingar ef gjaldtaka verður á bílastæðunum.
Greining á bílastæðaþörf barst stuttu fyrir fund
Bæjarráð frestaði því að taka afstöðu til tilboðsins á fundi í mars síðastliðnum og fól bæjarstjóra að láta vinna greiningu á bílastæðaþörf á miðsvæði Selfoss til næstu framtíðar. Á fundinum í gær lagði Eggert Valur til að málinu yrði frestað í ljósi þess að skýrsla VSÓ um greiningu á bílastæðaþörfinni barst ekki fyrr en stuttu fyrir fund og bæjarfulltrúum hefði ekki gefist kostur á að kynna sér efni hennar. Sem fyrr segir felldu Gunnar og Tómas Ellert þá tillögu og samþykktu tilboð Sigtúns þróunarfélags en Eggert greiddi atkvæði á móti. Meirihlutinn í Árborg er því klofinn í þessu máli.
Vegna mótatkvæðis Eggerts þarf bæjarstjórn að samþykkja samninginn á næsta fundi sínum ásamt kostnaðarviðauka vegna þessa sem verður lagður fyrir bæjarstjórn. Málið verður tekið fyrir á næsta fundi bæjarstjórnar.
Eggert Valur furðu lostinn
Eggert Valur furðar sig á því að bæjarfulltrúar D og M lista séu tilbúnir til að skuldbinda sveitarfélagið um hundruði milljóna „á sama tíma og oddviti D-listans og félagar hans hafa lýst yfir þungum áhyggjum í fjölmiðlum af fjárhagslegri stöðu sveitarfélagsins, rekstrarniðurstöðu sem er tilkomin vegna uppbyggingar grunninnviða og kostnaðar vegna aukinnar þjónustu við þann fjölda fólks sem flutt hefur búferlum til sveitarfélagsins. Þátttaka í verkefninu sem hér um ræðir snýr hvorki að uppbyggingu innviða né styrkingu á þjónustu sveitarfélagsins. Auk þess er fjárfestingin hvorki á áætlun þessa né næsta árs, né þriggja ára fjárfestingaráætlun sveitarfélagsins,“ segir Eggert Valur í bókun á fundinum.
Tómas Ellert hefur áhyggjur af bílastæðaþörf
Tómas Ellert segir í bókun sinni að hann hafi miklar áhyggjur af aukinni bílastæðaþörf og þeim bílastæðavanda sem sé í uppsiglingu á Selfossi með tilkomu þeirrar auknu starfsemi sem fyrirhuguð er eða er komin af stað í og við miðbæ Selfoss.
„Það er mitt mat eftir mikla yfirlegu að sú starfsemi muni auka mjög aðsókn íbúa og gesta á miðbæjarsvæðið. Fyrir utan nýjan miðbæ að þá er sveitarfélagið í samstarfi við ríkið að fullgera menningarsalinn sem mun taka um 350 manns í sæti og því nauðsynlegt að bæta við bílastæðum eingöngu vegna þess verkefnis. Nú hefur sveitarfélaginu boðist að leigja eða kaupa bílastæði af einkaaðila sem mun mæta þeirri þörf að hluta. Það er mín skoðun að ekki sé hægt að hafna þessu tilboði í ljósi framangreinds,“ segir Tómas Ellert.
Sigtún þróunarfélag býður Árborg að leigja bílastæðahús í miðbænum