Alls voru 62% aðspurðra fylgjandi náttúru- og innviðagjaldi í Gallupkönnun sem gerð var fyrir Samfylkinguna nú í nóvember.
24,6 prósent segjast andvíg og 13,4 prósent tóku ekki afstöðu. Af þeim sem tóku afstöðu eru tæplega 72 prósent hlynnt gjaldtökunni en rúmlega 28 prósent andvíg.
Spurt var um þá útfærslu sem lögð er til í frumvarpi atvinnuvegaráðherra um málið og hljóðaði spurningin svo:
Fyrirhugað er að taka upp sérstakt náttúru- og innviðagjald fyrir aðgang að Gullfossi, Geysi og Þingvöllum. Gjaldið er ætlað erlendum ferðamönnum en samkvæmt tillögunni myndu allir einstaklingar 18 ára og eldri sem ekki hafa skattalega heimilisfesti á Íslandi þurfa að greiða það. Gjaldið yrði 4.500 krónur yfir sumartímann og 3.000 krónur yfir vetrartímann og myndi veita aðgang að öllum þremur stöðunum í eitt ár. Hversu hlynnt(ur) eða andvíg(ur) ert þú þessari fyrirhuguðu gjaldtöku?
Spurningin var lögð fyrir dagana 5.-16. nóvember, að beiðni Samfylkingarinnar. Í úrtakinu hjá Gallup voru 1.980 manns, 18 ára og eldri, af landinu öllu. 845 manns svöruðu, sem jafngildir 42,7% svarhlutfalli.

