Lögreglan á Suðurlandi hefur nú í nokkrar vikur haft íkveikjur á Selfossi til rannsóknar. Ítrekað hefur verið kveikt í fjölbýlishúsi við Fossveg á Selfossi og fleiri íkveikjur eru til rannsóknar.
Meintur brennuvargur var loks handtekinn síðastliðinn miðvikudag og fór lögreglan fram á gæsluvarðhald yfir honum. Í tilkynningu frá lögreglunni á Suðurlandi segir að Héraðsdómur Suðurlands hafi í dag úrskurðað viðkomandi í gæsluvarðhald til 24. október.
Fjórða íkveikjan í fjölbýlishúsinu við Fossveg var síðastliðinn miðvikudag og daginn áður kviknaði eldur í Nytjamarkaðnum á Selfossi. Sá eldsvoði er einnig rannsakaður sem íkveikja.