Alls voru skráð um 150 verkefni í dagbók lögreglunnar á Suðurlandi um síðustu helgi.
Tilkynnt var um tvö slys á fólki. Annars vegar sprakk flugeldur í andlit einstaklings og hins vegar slasaðist ferðamaður við Seljalandsfoss.
Alls voru 24 ökumenn kærðir fyrir of hraðan akstur í umdæminu um helgina og fjórir ökumenn fyrir að vera ekki með ökuréttindi. Umferðardeild lögreglu var jafnframt með sérstakt eftirlit með þungatakmörkunum og voru tveir ökumenn vöruflutningabifreiða kærðir fyrir brot á þeim.
Einum gististað var lokað þar sem rekstrarleyfi var ekki til staðar og einn aðili var stöðvaður grunaður um að vera að starfa við ferðaþjónustu án atvinnuleyfis og rekstrarleyfis, ásamt því að vera ekki með réttindi til að aka farþegum í atvinnuskyni.