Inga Sæland, mennta- og barnamálaráðherra, opnaði í dag formlega nýtt meðferðarheimili Barna- og fjölskyldustofu: Lækjarbakka í Gunnarsholti. Engin bið er nú eftir plássi fyrir börn og ungmenni í vímuefnavanda á meðferðarheimilum á vegum stjórnvalda.
„Það er stórt skref að Lækjarbakki sé kominn í fullan rekstur og að börn sem þurfa hjálp á meðferðarheimilum fái hana strax,“ segir Inga Sæland, mennta- og barnamálaráðherra. „Börn eiga aldrei að bíða eftir aðstoð. Við eigum að grípa þau og standa með þeim – öllum börnum og alltaf. Við getum gert enn betur í þeim efnum og munum halda því áfram.“
Á heimilinu er rými fyrir sex ungmenni og hefur húsnæðið verið endurnýjað og lagað að starfseminni með áherslu á öryggi, hlýlegt umhverfi og heimilislegt yfirbragð. Starfsfólk Lækjarbakka hefur fengið þjálfun í þeirri aðferðafræði sem beitt er á meðferðarheimilum Barna- og fjölskyldustofu, þar sem áhersla er lögð á einstaklingsmiðaða nálgun, faglegt meðferðarstarf og gagnreyndar leiðir í þjónustu við ungmenni.
Dögg Þrastardóttir forstöðumaður Lækjarbakka stýrði dagskránni og bauð gesti velkomna. Inga Sæland flutti ávarp og opnaði heimilið formlega. Þá ávarpaði Ólöf Ásta Farestveit, forstjóri Barna- og fjölskyldustofu, gesti og Margrét Harpa Guðsteinsdóttir varaoddviti flutti ávarp fyrir hönd sveitarstjórnarinnar.
Að loknum ávörpum gengu ráðherra og gestir um húsnæðið með leiðsögn starfsfólks sem veitti innsýn í daglegt starf meðferðarheimilisins. Þá var sýnd myndasyrpa sem rakti uppbyggingu Lækjarbakka og greint frá styrkveitingu frá Rebekkustúku nr. 4 innan Oddfellow til kaupa á hljóðfærum fyrir heimilið. Slíkur stuðningur nýtist í daglegu starfi og getur styrkt uppbyggjandi virkni, sköpun og jákvæða þátttöku ungmennanna.
