Meðferðarheimilið Lækjarbakki hóf störf í dag í nýju húsnæði í Gunnarsholti á Rangárvöllum og tók á móti sínu fyrsta barni. Opnunin markar mikilvægan áfanga í framhaldsmeðferð fyrir drengi sem glíma við vímuefnavanda.
Lækjarbakki eykur getu samfélagsins til að bregðast við erfiðum og flóknum málum barna og ungmenna á Íslandi en þar verður pláss fyrir sex ungmenni.
„Löng bið er á enda og mikið fagnaðarefni að Lækjarbakki sé tekinn til starfa í nýju og endurbættu húsnæði” segir Inga Sæland, mennta- og barnamálaráðherra.
Nýtt og endurbætt húsnæði er sérstaklega hannað með þarfir skjólstæðinga í huga þar sem horft er til að skapa heimilislegt yfirbragð og hlýlegt umhverfi með öryggi í fyrirrúmi.
Starfsmenn á Lækjarbakka hafa fengið yfirgripsmikla þjálfun í þeirri aðferðafræði sem beitt er á meðferðarheimilum Barna- og fjölskyldustofu. Meðferðin er sérhæfð fyrir ungmenni og byggir á samþættingu gagnreyndra aðferða og einstaklingsmiðaðrar nálgunar.
Formleg opnun fer fram síðar í mánuðinum en brýnt var að hefja þjónustu strax og því var tekið á móti fyrsta skjólstæðingnum um leið og tilskilin leyfi lágu fyrir.
