Með Óskari á slóðum Gunnars og Njáls

Á dögunum fór 2. bekkur Menntaskólans að Laugarvatni í vettvangsferð um sögusvið Njálu en sagan er lesin í áfanganum ÍSL 303. Leiðsögumaðurinn var ekki af verri endanum, fyrrverandi kennari og aðstoðarskólameistari við ML, Óskar Ólafsson.

Óskar var duglegur að spyrja nemendur út úr sögunni og var ánægður með undirtektir, hann rakti helstu ættir í Njálu og inn í frásögn um Njálu fléttaði hann ýmsum fróðleik úr landafræði og sögu.

Fyrst var farið að Gunnarssteini þar sem þeir bræður Gunnar, Kolskeggur og Hjörtur börðust við þrjátíu menn og höfðu sigur. Því næst var heimsókn í Sögusetrið á Hvolsvelli þar sem nemendur fengu nokkuð áhugaverðan fyrirlestur um nýjar söguskýringar úr Njálu. Að lokinni skoðunarferð um Sögusetrið var farið í pizzahlaðborð í Gallerý pizza á Hvolsvelli áður en ferðinni var áframhaldið inn Fljótshlíðina.

Komið var að Hlíðarenda, horft yfir sveitina og spáð og spökulerað í söguna og sögusviðið. Meðan ekið var úr Fljótshlíðinni niður að Stóra Dímon flutti Óskar Gunnarshólma fyrir nemendur, blaðalaust og án þess að hika, og það hefði mátt heyra saumnál detta (ef ekki hefði verið fyrir skröltið í rútunni) svo uppnumdir voru nemendur yfir flutningnum.

Að lokum var komið við á Bergþórshvoli áður en haldið var heim á leið. Nemendur voru til fyrirmyndar í alla staði og sameinuðust um að gera ferðina vel heppnaða.

Þetta kemur fram í pistli Ingibjargar Bjarneyjar Baldursdóttur, íslenskukennara, á heimasíðu ML.