Lögreglan á Selfossi kærði 23 ökumenn fyrir hraðakstur í síðustu viku, sjö fyrir að virða ekki stöðvunarskyldu og einn fyrir að nota ekki öryggisbelti.
Þetta kemur fram í dagbók lögreglunnar á Selfossi.
Tvö slys voru tilkynnt á erlendum ferðamönnum sem leigðu sér snjósleða á Langjökli. Sl. laugardag slösuðust tvær erlendar konur, fæddar 1935 og 1941 þegar önnur þeirra missti stjórn á sleða sem hún var að leggja af stað á. Mun önnur kvennanna hafa viðbeinsbrotnað en meiðsl hinnar voru minni.
Í gær slasaðist svo erlend kona fædd 1951 á hendi og baki þegar hún féll af sleða sem hún ók. Meiðsl hennar munu vera minniháttar.