Ferðasíðan Guide to Iceland valdi veitingastaðinn Mar í miðbæ Selfoss besta veitingastaðinn á Selfossi í úttekt sem birt var í sumar. Tómas Þóroddsson, veitingamaður á Mar, gleðst yfir útnefningunni og segir að umfjöllunin hafi strax haft mikil áhrif á bókanir.
Guide to Iceland, sem er leiðandi í heiminum í umfjöllun um íslenska ferðaþjónustu, segir að Mar hafi á skömmum tíma orðið í miklu uppáhaldi hjá heimamönnum, enda sé hráefnið eins ferskt og hugsast getur, andrúmsloftið afslappað og upplifunin fáguð. Réttirnir á fjölbreyttum matseðlinum séu útbúnir af vandvirkni og skammtarnir eru rausnarlegir.
„Við höfum fundið mikið fyrir þessu, Guide to Iceland er gefið út á fjölda tungumála þannig að þetta er frábær auglýsing fyrir okkur. Við fundum strax mun á því hvað það var mikið meira að gera í sumar heldur en í fyrrasumar,“ segir Tómas í samtali við sunnlenska.is.
„Hugmyndin á bak við Mar er einföld og bæði heimamenn og ferðamenn frá öllum heimshornum eru hrifnir af því, hér er íslenskt sjávarfang í öndvegi og réttirnir eru innblásnir af því sem ég ólst upp við. Margir réttanna á matseðlinum eiga sér langa sögu á íslenskum heimilum og útlendingarnir eru spenntir fyrir því,“ bætir Tómas við.
Að sögn Tómasar er ýmislegt framundan á staðnum, spennandi jólaseðill er á leiðinni og auðvitað verður boðið upp á skötu á Þorláksmessu. „Skatan er fastur liður hjá ansi mörgum og við erum þegar byrjuð að taka niður pantanir fyrir skötuna,“ segir Tómas að lokum.