Veitingastaðurinn MAR í miðbæ Selfoss hefur verið opnaður aftur eftir skammvinna lokun.
MAR lokaði tímabundið í janúar, yfir rólegustu mánuðina, en opnaði aftur með krafti 21. maí síðastliðinn. Á matseðlinum eru ýmsar nýjungar sem hafa fengið afar góðar viðtökur.
„Við erum með nokkrar nýjungar, eins og til dæmis humarpönnu og Haf og hagi, sem er lambalundir og humar. Eins erum við með humarsúpu Betri stofunnar sem sló í gegn á Betri stofunni á Hótel Selfossi 1991-1997. Við erum búin að bæta við íslenskum rækjum og íslenskri hörpuskel í humarsúpuna og hún er nokkuð góð. Betri stofan var af mörgum talin besti veitingastaðurinn á svæðinu á sínum tíma. Reyndar voru mun færri staðir en í dag og samkeppnin öðruvísi,“ segir Tómas Þóroddsson, eigandi MAR, í samtali við sunnlenska.is.
„Viðtökurnar hafa verið vonum framar eftir að við opnuðum aftur. Það er greinilegt að heimamenn jafnt og ferðamenn kunna að meta góðan fisk,“ segir Tómas, kátur að lokum.