Um 17 í dag var Björgunarsveitin Mannbjörg í Þorlákshöfn kölluð út til að veita óveðursaðstoð í bænum en byggingarefni var farið að fjúka um götur bæjarins.
Mannbjörg fékk svo annað útkall um klukkan 20 í kvöld, ásamt Hjálparsveit skáta í Hveragerði, til þess að aðstoða ökumenn í vanda bæði á Hellisheiði og í Þrengslum. Þar var skafrenningur og mjög blint á köflum og mönnuðu björgunarsveitarmenn svo lokunarpósta á Hellisheiði.
Vegurinn yfir Hellisheiði er ennþá lokaður en Vegagerðin vonast til að hægt verði að opna á næsta klukkutímanum.